Tinatayang aabot sa isang libong (1,000) mga estudyante at guro mula sa Narra Integrated School sa bayan ng Narra, Palawan ang nakiisa sa isinagawang Byaheng Kalusugan: Mental Health Awareness Campaign na isinakatuparan ng Pamahalaang Panlalawigan ng Palawan sa pamamagitan ng Provincial Health Office (PHO).

Sa layuning mapataas ang kamalayan at kaalaman ng mga Palaweño patungkol sa usaping mental health, nagsagawa ang PHO ng ‘Thank You, Self: Self Care’ Vlog Making Contest na nilahukan ng mga estudyante mula sa NIS. Mayroon ding inilagay na iba’t ibang booths para sa FeelingSkwela Fair at nagsagawa rin ng pagbisita ang mga partisipante sa Narra Municipal Hospital-Mental Health Clinic.

Ang naturang aktibidad na ginanap noong Oktubre 29, 2024 ay naisakatuparan sa pakikipagtulungan ng Department of Health, Center for Health Development-MIMAROPA, Provincial Department of Health Office (PDOHO), Narra Municipal Health Office, DepEd Palawan, Narra Integrated School, Provincial Gender and Development Office (PGADO), at ilang pribadong kumpanya.